အိန္ဒိယနိုင်ငံအာဏာပိုင်များဟာ တင်းကြပ်ပြင်းထန်တဲ့ Online ပေါ်ရှိ ပြောဆိုဆက်သွယ်မှုဆိုင်ရာ ဥပဒေများကို ထုတ်ပြန်ခဲ့တဲ့အတွက် Twitter က ၎င်းတို့ကိုတရားစွဲဆိုထားလိုက်ပြီဖြစ်ကြောင်း ဇူလိုင်လ ၅ ရက်နေ့က ကြေငြာချက်ထုတ်ပြန်ခဲ့ပါတယ်။ 

အဆိုပါ တရားစွဲဆိုမှုဟာ အိန္ဒိယအစိုးရမှ အိန္ဒိယနိုင်ငံဆိုင်ရာ ကြမ်းတမ်းသောစကားလုံးနှင့် အသရေဖျက်မှုဆိုင်ရာဥပဒေကို ချိုးဖောက်လျှက်ရှိနေတဲ့ အကောင့်များနဲ့ post များကို ပယ်ဖျက်စေဖို့ Twitter အား အမိန့်ပေးခဲ့တဲ့ကိစ္စကနေ စတင်ခဲ့တာဖြစ်ပါတယ်။ New York Times မှ ရေးသားထားတဲ့ သတင်းများအရ ယခုအခါတွင် Twitter က အဆိုပါ post များကို ဖယ်ရှားပေးခဲ့ပြီးဖြစ်သော်လည်း နောင်အခါများတွင် ထိုသို့သော အမိန့်ပေးမှုများကို ရှောင်ရှားနိုင်ရန်အတွက် တရားဥပဒေအကာအကွယ်ကို ရရှိနိုင်ရန် ဆောင်ရွက်နေခြင်းဖြစ်ပါတယ်။ 

ပြီးခဲ့တဲ့ မေလအတွင်းကလည်း Online content များအတွက် IT ဥပဒေအသစ်များကို အိန္ဒိယနိုင်ငံတွင် စတင်ထုတ်ပြန်ခဲ့ပြီး မကြာမှီတွင် Twitter ရဲ့ အိန္ဒိယနိုင်ငံတွင်းရှိရုံးခန်းများကို ရဲအရာရှိများဖြင့် ဝင်ရောက်စီးနင်းခဲ့ကြပါတယ်။ ယခုဇူလိုင်လအတွင်းမှာတော့ အိန္ဒိယနိုင်ငံ အာဏာပိုင်များက Twitter ကို အသုံးပြုနေသူများမှ အနာဂါတ်တွင်ချိုးဖောက်လာနိုင်သည့် ဥပဒေများအတွက် Twitter ကို အရေးယူသွားမည်ဟု ခြိမ်းခြောက်ခဲ့တယ်လို့ သိရှိရပါတယ်။