ဒီဇင်ဘာလ ၁၈ ရက်နေ့တွင်ပြုလုပ်ခဲ့သော livestream တစ်ခုအတွင်းတွင် Mario ကိုဖန်တီးသူ ဖခင်ကြီးဖြစ်တဲ့ Shigery Miyamoto မှ fan များကို Universal Studios Japan တွင် ဖွင့်လှစ်တော့မည့် Super Nintendo World အား ကြိုတင်၍ ပြသပေးခဲ့ပါတယ်။ အဆိုပါ Nintendo-themed Park ကို ဖေဖော်ဝါရီလ ၄ ရက်နေ့၊ ၂၀၂၁ ခုနှစ်တွင် ဖွင့်လှစ်သွားမှာဖြစ်ကြောင်းကိုလည်း သိရှိခဲ့ရပါတယ်။ Mr Miyamoto ရဲ့ ပြောကြားချက်အရ Super Nintendo World ဟာ စင်္ကာပူနဲ့ အမေရိကန်နိုင်ငံအတွင်းရှိ Universal theme park များတွင်လည်း ဖွင့်လှစ်သွားဖို့စီစဉ်နေကြောင်း ပြောကြားသွားခဲ့ပါသေးတယ်။

လက်ရှိအချိန်၌ ကမ္ဘာတစ်ဝှမ်းတွင် Universal Studios Theme Park စုစုပေါင်း ၄ ခုရှိထားပြီး အနောက်နိုင်ငံတွင်ရှိသော Universal Studios ၂ ခုနှင့် ဂျပန်နိုင်ငံမှလွဲလျှင် စင်္ကာပူဟာ Super Nintendo World ကို တည်ဆောက်နိုင်ခွင့်ရှိသော အာရှနိုင်ငံများအတွင်း တစ်ခုတည်းသောနေရာတစ်ခုဖြစ်လာပါတယ်။

ဧပြီလ ၂၀၁၉ ခုနှစ်ကတည်းက Resorts World Sentosa ဟာ စင်္ကာပူဒေါ်လာ ၄.၅ ဘီလျံကုန်ကျမည့် တိုးချဲ့မှုအစီအစဉ်တစ်ရပ်ကို ထုတ်ဖော်ပြသခဲ့ပြီး Universal Studios Singapore သို့ရောက်ရှိလာမည့် attraction နေရာအသစ် ၂ ခုဖြစ်တဲ့ Super Nintendo World နဲ့ Minion Park တို့အတွက် ပြင်ဆင်မှုများကို ပြုလုပ်နေခဲ့တာပဲဖြစ်ပါတယ်။