ရုရှားနိုင်ငံမှ ယူကရိန်းသို့ ကျူးကျော်ပြီး (၃) လခန့်အကြာတွင် Microsoft က ရုရှားနိုင်ငံအတွင်းရှိ ၎င်းတို့ရဲ့စီးပွားရေးလုပ်ငန်းအတော်များများကိုလျှော့ချခဲ့တယ်လို့ ပြောကြားလာခဲ့ပါတယ်။ 

Microsoft ဟာ ရုရှားနိုင်ငံအတွင်း ထုတ်ကုန်နှင့်ဝန်ဆောင်မှုအသစ်များကို ပေးအပ်ဖို့ မတ်လအစောပိုင်းတွင် ရုတ်သိမ်းခဲ့ပြီး ယခုအခါ Bloomberg မှ သတင်းများအရ ၎င်းတို့ရဲ့ စီးပွားရေးလုပ်ငန်းများကို စတင်လျှော့ချမှု ပြုလုပ်သွားမှာဖြစ်တဲ့အတွက် Microsoft က ဝန်ထမ်းပေါင်း ၄၀၀ ခန့်ကို အလုပ်မှထုတ်ပယ်ခဲ့ကြောင်း သိရှိရပါတယ်။ 

“ရုရှားနိုင်ငံအတွင်းရှိကျွန်ုပ်တို့ရဲ့လုပ်ငန်းများအပေါ်ထိခိုက်မှုရှိလာပြီး စီးပွားရေးရှုထောင့်တွင် အပြောင်းအလဲများဖြစ်ပေါ်လျှက်ရှိနေတဲ့အတွက် ရုရှားနိုင်ငံအတွင်းရှိ စီးပွားရေးလုပ်ငန်းနှင့်ဆက်နွယ်သောဆောင်ရွက်ချက်များကို ဒီကဲ့သို့လျှော့ချဖို့ ကျွန်ုပ်တို့ဆုံးဖြတ်ချက်ပြုလုပ်ခဲ့ရပါတယ်” ဟူ၍ Microsoft ရဲ့ ပြောရေးဆိုခွင့်ရပုဂ္ဂိုလ်တစ်ဦးက Bloomberg သတင်းဌာနသို့ ပြောကြားခဲ့ပါတယ်။ “ရုရှားနိုင်ငံသားသုံးစွဲသူများနဲ့ ကျွန်ုပ်တို့အကြားတွင် ရှိပြီးသားဖြစ်တဲ့ သဘောတူညီချက်များကိုတော့ ဆက်လက်၍ဆောင်ရွက်ပေးသွားဦးမှာဖြစ်သော်လည်း အသစ်ထပ်မံရောင်းချမှုများကိုတော့ ထပ်မံ၍ကန့်သတ်ထားဦးမှာဖြစ်ပါတယ်” ဟူ၍လည်း သူကပြောကြားခဲ့ပါသေးတယ်။