Insider မှ သတင်းတစ်ပုဒ်အရ Microsoft ဟာ ၎င်းတို့ရဲ့ free-to-play Xbox game များတွင် ကုန်ပစ္စည်းအမှတ်တံဆိပ်များအနေနဲ့ ၎င်းတို့ရဲ့ ကြော်ငြာများကိုထည့်သွင်းဖော်ပြနိုင်စေမည့် အစီအစဉ်တစ်ခုကို စတင်အကောင်အထည်ဖော်ဆောင်ရွက်လျှက်ရှိနေပြီဖြစ်တယ်လို့ သိရှိရပါတယ်။ 

အဆိုပါကိစ္စနဲ့ ဆက်နွယ်နေသူများမှ Insider သို့ ပြောကြားချက်အရ - ၎င်းကြော်ငြာများဟာ ဂိမ်းကစားခြင်းအား အနှောက်အယှက်ဖြစ်စေမှာမဟုတ်ပဲ ဥပမာအားဖြင့် - racing game တစ်ခုအတွင်းရှိ ကြော်ငြာဆိုင်းဘုတ်များပေါ်တွင် ကြော်ငြာများကိုထည့်သွင်းဖော်ပြသွားမှာဖြစ်တယ်လို့ သိရှိရပါတယ်။ 

Insider ရဲ့ သတင်းအရင်းအမြစ်များရဲ့ ပြောကြားချက်အရ Microsoft ဟာ အဆိုပါ ကြော်ငြာများမှရရှိလာမည့် အမြတ်ငွေကိုရယူသွားမည်မဟုတ်ပဲ ထိုအစား game developer များနှင့် advertising company များထံသို့ ပြန်လည်မျှဝေပေးသွားမှာဖြစ်တယ်လို့ သိရှိရပါတယ်။ ကြော်ငြာများဟာ Xbox ပေါ်တွင် ယခုနှစ်ရဲ့ တတိယမြောက် (၃) လတာကာလအတွင်း စတင်ရောက်ရှိလာနိင်ပါတယ်။