သတင်းများအရ ဂျပန်နိုင်ငံရှိ သတင်းအချက်အလက်နှင့် ဆက်သွယ်မှုနည်းပညာ အမျိုးသားတက္ကသိုလ် - National Institute of Information and Communications Technology (NICT) ရှိ သိပ္ပံပညာရှင်များဟာ အင်တာနက်ဒေတာပို့လွှတ်မှုမြန်နှုန်းစံချိန်ကို 319 Tbps မြန်နှုန်းဖြင့် ချိုးဖျက်နိုင်ခဲ့ကြောင်း သိရှိခဲ့ရပါတယ်။ ဒါဟာ ဩဂုတ်လ ၂၀၂၀ ခုနှစ်တွင် ဗြိတိန်နှင့် ဂျပန်သုသေသနပညာရှင်များမှ စံချိန်တင်ထားခဲ့တဲ့ 179 Tbps စံချိန်ထက် ၂ ဆခန့်ပိုသော စံချိန်တစ်ခုပဲဖြစ်ပါတယ်။

ဒီအောင်မြင်မှုကို NICT မှ fiber optic line ရဲ့ အဆင့်တိုင်းကို upgrade ပြုလုပ်ပေးလိုက်ခြင်းအားဖြင့် ရရှိအောင် ဆောင်ရွက်နိုင်ခဲ့တာဖြစ်ပြီး ၎င်းတွင် ပုံမှန် Core ၁ ခုအစား Core ၄ ခုပါဝင်နေပါတယ်။ သုသေသနပညာရှင်များဟာ အဆိုပါ fiber optic line အတွင်းသို့ 552-channel comb laser ကို မတူညီတဲ့ လှိုင်းအလျားများစွာဖြင့် ပစ်ခတ်၍ မြေရှားဒြပ်စင်များနဲ့ ပြုလုပ်ထားတဲ့ amplifier များရဲ့ အထောက်အပံ့ပေးမှုများဖြင့်ပြုလုပ်နိုင်ခဲ့ကြတာဖြစ်ပါတယ်။

အဆိုပါစမ်းသပ်မှုဟာ ဓါတ်ခွဲခန်းအတွင်းတွင်သာ ပြုလုပ်ခဲ့ခြင်းဖြစ်သော်လည်း ဂျပန်သိပ္ပံပညာရှင်အဖွဲ့ဟာ fiber ကို အသုံးပြု၍ ဒေတာများကို ၁၈၆၄ မိုင်အကွာအဝေးသို့ signal အရည်အသွေးနှင့် မြန်နှုန်းတို့ ကျဆင်းခြင်း တစ်စုံတစ်ရာမရှိပဲ ပေးပို့နိုင်ခဲ့ကြပါတယ်။ များစွာသော စမ်းသပ်ချက်များနည်းတူ ဒီနည်းပညာကို လက်တွေ့မှာအသုံးချနိုင်ဖို့ဟာ အချိန်လိုအပ်ဦးမှာဖြစ်ပြီး ဈေးနှုန်းကြီးမြင့်မှုများရှိလာနိုင်သော်လည်း အနာဂါတ်တွင် တွင်တွင်ကျယ်ကျယ် အသုံးပြုလာရနိုင်ဖို့ရှိနေပါတယ်။