အမေရိကန် တရားရေးရာဌာန (Department of Justice) မှ Cryptocurrency များကို ရာဇဝတ်မှုနှင့် တရားမဝင်သောလုပ်ရပ်များအတွက် သုံးစွဲနေခြင်းအား စုံစမ်းစစ်ဆေးမှုများပြုလုပ်နိုင်ရန်အတွက် အဖွဲ့တစ်ခုကိုဖွဲ့စည်းလိုက်ပြီဖြစ်ပါတယ်။ 

၎င်းအဖွဲ့ကို အမျိုးသား Cryptocurrency စည်းကြပ်ရေးအဖွဲ့ (National Cryptocurrency Enforcement Team) ဟူ၍ အမည်ပေးထားပြီး NCET အနေနဲ့ virtual currency လဲလှယ်မှုများနှင့် ငွေကြေးခဝါချမှုတွင်ပါဝင်နေတဲ့ လူပုဂ္ဂိုလ်များနှင့် အဖွဲ့အစည်းများကို အဓိကထား၍ ကိုင်တွယ်မှုများကို ပြုလုပ်သွားမှာဖြစ်တဲ့အပြင် လိမ်လည်မှုများနဲ့ ransomware များကိုအသုံးပြု၍ ငွေညှစ်ခြင်းတို့ကြောင့် ဆုံးရှုံးသွားရတဲ့ ပိုင်ဆိုင်မှုများကို ပြန်လည်ခြေရာခံ၍ သိမ်းယူနိုင်ဖို့အတွက်ကိုလည်း ဆောင်ရွက်သွားမှာဖြစ်တယ်လို့ သိရှိရပါတယ်။ 

Department of Justice ရဲ့ ကြေငြာချက်အရ အဆိုပါအဖွဲ့ကို ငွေကြေးခဝါချမှုနှင့် ပိုင်ဆိုင်မှုများကို ပြန်လည်သိမ်းဆည်းရေးဌာန၊ ကွန်ပျူတာရာဇဝတ်မှုများနှင့် ဉာဏပိုင်ဆိုင်မှုဌာနများရှိ ကျွမ်းကျင်သူများကို ပေါင်းစည်း၍ ဖွဲ့စည်းလိုက်ခြင်းဖြစ်ပြီး အမေရိကန်တရားသူကြီးများရုံးခန်းမှ ကျွမ်းကျင်သူများကိုလည်း ထည့်သွင်းဖွဲ့စည်းထားကြောင်း သိရှိရပါတယ်။