အမေရိကန် (US) ရှယ်ယာကုန်သွယ်ရေး app တစ်ခုဖြစ်တဲ့ Robinhood တွင် ဆိုက်ဘာလုံခြုံရေးကျိုးပေါက်မှုတစ်ရပ်ဖြစ်ပွားခဲ့ပြီး အသုံးပြုသူ (၇) သန်းခန့်ရဲ့ အမည်များနဲ့ e-mail လိပ်စာများ ပေါက်ကြားခဲ့ကြောင်း BBC News မှ သတင်းတစ်ပုဒ်အရ သိရှိရပါတယ်။ 

ကုမ္ပဏီဘက်ကတော့ အဆိုပါလုံခြုံရေးကျိုးပေါက်မှုဟာ “ကျွန်ုပ်တို့ရဲ့ customer အချို့ရဲ့ ကိုယ်ရေးအချက်အလက်အနည်းငယ်သာ ပေါက်ကြားခဲ့တာဖြစ်ပါတယ်” ဟူ၍ပြောကြားခဲ့ပြီး ၎င်းတို့ကောက်ယူထားတဲ့ အရေးအကြီးဆုံးအချက်အလက်များဖြစ်တဲ့ - အမေရိကန်နိုင်ငံသားအမှတ်များနဲ့ ငွေရေးကြေးရေးဆိုင်ရာအချက်အလက်များကိုတော့ ခိုးယူရရှိသွားခြင်းမရှိဘူးဟူ၍ တထစ်ချယုံကြည်ထားတယ်လို့ သိရှိရပါတယ်။ 

Robinhood မှ အဆိုပါဒေတာအချက်အလက်များပေါက်ကြားမှုမရှိစေရေးအတွက် ငွေညှစ်တောင်းခံလာမှုကို ပေးကမ်းရန်ငြင်းဆိုခဲ့ပြီး အဆိုပါဆိုက်ဘာတိုက်ခိုက်မှုကို အာဏာပိုင်များသို့တိုင်ကြားခဲ့ပါတယ်။ “ဒီလိုငွေညှစ်လာမှုကို ခေါင်းငုံ့ခံသွားမယ့်အစား ကျွန်ုပ်တို့အနေနဲ့ အာဏာပိုင်များသို့တိုင်ကြားမှုပြုလုပ်ခဲ့ပြီး ပြင်ပ ဆိုက်ဘာလုံခြုံရေးကုမ္ပဏီတစ်ခုကို ဒီကိစ္စနဲ့ပတ်သက်၍ ဖြေရှင်းပေးရန် အကူအညီအနေနဲ့ ဌားရမ်းမှုပြုလုပ်ခဲ့ပါတယ်” ဟူ၍ Robinhood မှ ပြောကြားခဲ့ကြောင်း သိရှိရပါတယ်။