ပြီးခဲ့တဲ့လအတွင်း iPhone X တစ်လုံးကို ကမ္ဘာ့ပထမဆုံး USB-C iPhone အဖြစ်သို့ တစ်စုံတစ်ယောက်မှ ပြုပြင်ပြောင်းလဲမှုပြုလုပ်ခဲ့ကြောင်း သတင်းများထွက်ရှိခဲ့ပြီးနောက် ယခုအခါ အဆိုပါဖုန်းကို eBay ပေါ်တွင် ရောင်းချလိုက်ပြီးဖြစ်ပြီး အခြားသူတစ်ဦးမှ ကန်ဒေါ်လာ ၈၆,၀၀၁ ဖြင့် ဝယ်ယူသွားခဲ့တယ်လို့ သိရှိရပါတယ်။ 

ဒီပြုပြင်ပြောင်းလဲမှုကို Ken Pillonel လို့အမည်ရတဲ့ စက်ရုပ်နည်းပညာကျောင်းသားတစ်ဦးမှ ပြုလုပ်ခဲ့တာဖြစ်ပြီး မူရင်း eBay listing ပေါ်တွင် ၎င်းးက အဆိုပါ USB-C iPhone X ဟာ 64GB အမျိုးအစားဖြစ်တယ်လို့ ဆိုထားပြီး ဝယ်ယူသူများသတိထားရမယ့်အချက်အချို့ကိုလည်း ထည့်သွင်းပြောကြားခဲ့ပါတယ်။ ၎င်း iPhone အားအသုံးပြုစဉ်တွင် လေလံနိုင်သူအနေဖြင့် restore, update (သို့) အဆိုပါ iPhone အတွင်းရှိ data များကို erase မပြုလုပ်ရန်၊ နေ့စဉ်အသုံးပြုမည့်ဖုန်းတစ်လုံးအနေဖြင့် အသုံးမပြုရန်နှင့် ၎င်း iPhone ကို ဖွင့်လှစ်ခြင်းမပြုရန် မှာကြားခဲ့ပါတယ်။ 

ဒါ့အပြင် Ken က “ဒီဖုန်းကိုလက်ခံရရှိတဲ့အချိန်မှာ ဒီဖုန်းဟာကောင်းမွန်စွာအလုပ်လုပ်နေဖို့အတွက် ကျွန်တော့်ဘက်က အာမခံပါတယ်။ ဒါပေမယ့် အထက်ကပြောကြားထားတဲ့ ညွှန်ကြားချက်တွေကို လိုက်နာမှုမရှိရင်တော့ နောက်ဆက်တွဲကြုံတွေ့လာရမယ့် ပြဿနာများကို သင့်ဘာသင် ဖြေရှင်းရမှာဖြစ်ပါတယ်။ ဒါကြောင့် ဒီ iPhone ကို လေလံဆွဲ၍ ဝယ်ယူခဲ့ပြီးတဲ့နောက်မှာ မိမိတို့ကြိုက်သလို အသုံးပြုနိုင်သော်လည်း တစ်စုံတစ်ခုပျက်စီးသွားတဲ့အခါ ကျွန်တော့်ဘက်က အကူအညီပေးနိုင်ဖို့ကို မမျှော်လင့်ပါနဲ့ ဒါဟာ နမူနာပုံစံတစ်ခုသာဖြစ်ပါတယ်” ဟူ၍ ထည့်ပေါင်းပြောကြားခဲ့ပါတယ်။