YouTube Music နဲ့ YouTube Premium ဝန်ဆောင်မှုများကို subscribe ပြုလုပ်၍အသုံးပြုသူပေါင်း သန်း ၅၀ ခန့်ရှိနေပြီဖြစ်ကြောင်း မကြာသေးမှီက Google မှထုတ်ပြန်ကြေငြာခဲ့ပါတယ်။ ဒါဟာ ဒီဇင်ဘာလ၊ ၂၀၂၀ ခုနှစ်ကကြေငြာခဲ့တဲ့ Subscriber ပေါင်း သန်း ၃၀ မှ သိသိသာသာကို တိုးတက်မှုရှိလာတဲ့ ပမာတစ်ခုဖြစ်ပါတယ်။ 

ဒီကိန်းဂဏ္ဍန်းများအရ အသုံးပြုသူများဟာ အခြားသောအပြိုင်အဆိုင်ဝန်ဆောင်မှုများအကြားတွင်တောင်မှ YouTube နဲ့ YouTube Music တို့ရဲ့ free version များမှ Premium ဝန်ဆောင်မှုများသို့ ပိုမို၍ကူးပြောင်းလာကြတာကိုပြသလျှက်ရှိနေပါတယ်။ Google မှ ဒီ သန်း ၅၀ ကို အသေးစိတ်ဖော်ပြမထားတဲ့အတွက် ထိုအထဲကမှ အသုံးပြုသူမည်မျှဟာ YouTube Music နဲ့ Premium ဝန်ဆောင်မှုများကို အမှန်တကယ် Subscribe ပြုလုပ်၍အသုံးပြုနေပြီး မည်မျှကတော့ ၁ လ အခမဲ့စမ်းသပ်အသုံးပြုမှုပြုလုပ်နေသလဲဆိုတာကို သိရှိရခြင်းမရှိသေးပါဘူး။ 

ဈေးနှုန်းအားဖြင့် YouTube Music Premium ကို subscription ပြုလုပ်ဖို့အတွက် ၁ လလျှင် ကန်ဒေါ်လာ ၉.၉၉ ကျသင့်မှာဖြစ်ပြီး YouTube Premium ကတော့ ၁ လလျှင် ကန်ဒေါ်လာ ၁၁.၉၉ ကျသင့်မှာဖြစ်ကာ ဝန်ဆောင်မှု ၂ ခုစလုံးဟာ အသုံးပြုသူများကို YouTube မှ တေးသီချင်းများ၊ ရုပ်ရှင်များနဲ့ video များကို download ပြုလုပ်ခြင်း၊ ကြော်ငြာများမပါပဲ ဆက်တိုက်ကြည့်ရှုနိုင်ခြင်း၊ အစရှိတဲ့အားသာချက်များကို ရရှိနိုင်မှာဖြစ်ပါတယ်။