ဆိုက်ဘာလုံခြုံရေးပညာရှင်အဖွဲ့ Zimperium မှ Android အသုံးပြုသူများအား “System Update” app အယောင်ဆောင်ထားသော malware အား install ပြုလုပ်မိခြင်းမှရှောင်ရှားနိုင်ရန်အတွက် Blog post တစ်ခုတွင် ရေးသား၍ အသိပေးခဲ့ပါတယ်။ 

အဆိုပါ app ကို device များပေါ်တွင် install ပြုလုပ်မိခဲ့ပါက SMS message များ၊ clipboard data များ၊ Credit Card အချက်အလက်များနဲ့ တစ်ကိုယ်ရေအချက်အလက်များ၊ အရေးကြီးသောအချက်အလက်များကို အသုံးပြုနေသူများရဲ့ ဖုန်းနဲ့ tablet များပေါ်မှ ခိုးယူသွားနိုင်တဲ့အပြင် ဖုန်းကင်မရာများနဲ့ mic များကို hijack ပြုလုပ်၍ device ပိုင်ရှင်များကို စောင့်ကြည့်မှုများပြုလုပ်နိုင်ကြောင်းကိုလည်း ပြောကြားသွားခဲ့ပါတယ်။ 

အဘယ်ကြောင့်ဆိုသော် အဆိုပါ app ဟာ Remote Access Trojan (RAT) ဟုခေါ်သော malware တစ်ခုဖြစ်ပြီး ထိုအရာက အသုံးပြုသူများရဲ့ ဒေတာအချက်အလက်များကို သူတို့ရဲ့ ပင်မဆာဗာသို့ ပြန်လည်ပေးပို့နိုင်စွမ်းရှိတဲ့အတွက် နောက်ကွယ်မှကြိုးကိုင်နေသူအနေနဲ့ device ပိုင်ရှင်များရဲ့အကြောင်း များစွာသောအချက်အလက်များကို သိရှိသွားနိုင်လို့ပဲဖြစ်ပါတယ်။