Voice Social Network တစ်ခုဖြစ်တဲ့ Clubhouse ဟာ သူတို့ဝန်ဆောင်မှုရဲ့ Beta Version ကို အမေရိကရှိ အသုံးပြုသူများအတွက် Android ပေါ်တွင်လွှင့်တင်ပေးခဲ့အပြီး ရက်အနည်းငယ်အကြာတွင် ပြီးခဲ့တဲ့တနင်္ဂနွေနေ့ (မတ်လ၊ ၁၈ရက်နေ့၊ ၂၀၂၁) က သူတို့ရဲ့ Android app ကို တစ်ကမ္ဘာလုံးမှအသုံးပြုနိုင်ရန်အတွက် ယခုတစ်ပတ်အတွင်း လွှင့်တင်ပေးတော့မှာဖြစ်ကြောင်း ပြောကြားလာခဲ့ပါတယ်။

A16z, Tiger Global နှင့် DST Global တို့မှ ပူးပေါင်းထောက်ပံ့ပေးခဲ့တဲ့ အဆိုပါ startup ဟာ ယခုအခါတွင် ကန်ဒေါ်လာ ၄ ဘီလျံခန့်တန်ကြေးရှိနေခဲ့ပြီး ထိုအရာကို ဂျပန်၊ ဘရာဇီးနှင့် ရုရှားနိုင်ငံများတွင် ယခုတစ်ပတ် အင်္ဂါနေ့တွင် Android app အနေနဲ့ထုတ်လွှင့်ပေးတော့မှာဖြစ်ပြီး နိုင်ဂျီးရီးယားနှင့် အိန္ဒိယနိုင်ငံများတွင်တော့ နောက်ထပ် ၃ ရက်အကြာတွင်နှင့် ကျန် ကမ္ဘာ့နေရာအသီးသီးသို့ သောကြာနေ့ နေ့ခင်းပိုင်းတွင် ထုတ်လွှင့်ပေးသွားမှာဖြစ်ကြောင်း ပြောကြားသွားခဲ့ပါတယ်။

Clubhouse ကို ယခင်က iPhone သီးသန့် app တစ်ခုအနေနဲ့ မနှစ်က စတင်ထုတ်လွှင့်ခဲ့ပြီးနောက် ပြီးခဲ့တဲ့နှစ်အတွင်း အတန်အသင့်ရေပန်းစားလာခဲ့ပြီး နာမည်ကြီး Celebrity အချို့၊ နိုင်ငံရေးသမားများ၊ ရင်းနှီးမြှုပ်နှံသူများနှင့် စွန့်ဦးတီထွင်လုပ်ငန်းရှင်များကို အသုံးပြုလာကြရန်အတွက် ဆွဲဆောင်နိုင်ခဲ့ပါတယ်။