တရုတ်ပြည်သူ့သမ္မတနိုင်ငံတွင် အသုံးပြုသူများရဲ့ ကိုယ်ရေးအချက်အလက်များကို အကာအကွယ်ပေးနိုင်ရန် ရည်ရွယ်ရေးဆွဲထားသော Privacy ဥပဒေအသစ်တစ်ရပ်ကို ချမှတ်ခဲ့ကြောင်း နိုင်ငံပိုင်မီဒီယာများမှ သတင်းများအရ သိရှိခဲ့ရပါတယ်။ 

အဆိုပါဥပဒေအသစ်ကို ယခုအခါ နည်းပညာကုမ္ပဏီများအပေါ် တရုတ်နိုင်ငံရဲ့ အုပ်ချုပ်မှုပြောင်းလဲသွားသည်နှင့်အညီ ကုမ္ပဏီများအနေနဲ့ အသုံးပြုသူများရဲ့အချက်အလက်များကို မည်သို့ ကိုင်တွယ်မှုပြုလုပ်သွားရမည်နှင့် ပတ်သက်ပြီး ဥပဒေအသစ်များချမှတ်ပေးခဲ့တာဖြစ်ပြီး လာမည့် နိုဝင်ဘာလ ၁ ရက်နေ့မှစတင်၍ အကျိုးသက်ရောက်မှုရှိလာတော့မှာဖြစ်ပါတယ်။ 

အဆိုပါ Personal Information Protection Law ကို ပြီးခဲ့တဲ့ ဩဂုတ်လ ၂၀ ရက်နေ့ က တရုတ်ပြည်သူ့သမ္မတနိုင်ငံအတွင်း စတင်ကြေငြာမှုပြုလုပ်ခဲ့တာဖြစ်ပြီး အဆိုပါဥပဒေအရ ကုမ္ပဏီများအနေနဲ့ ကိုယ်ရေးအချက်အလက်များကို ကောက်ခံမှုမပြုလုပ်မှီတွင် အသုံးပြုသူများရဲ့ခွင့်ပြုချက်ကို ရယူဖို့လိုအပ်တော့မှာဖြစ်ပါတယ်။ ဒါ့အပြင်ကုမ္ပဏီများအနေနဲ့ အသုံးပြုသူများရဲ့ အချက်အလက်များကို တရုတ်နိုင်ငံပြင်ပသို့ ပေးပို့ရန်လိုအပ်သည့်အခါ အဆိုပါအချက်အလက်များ ပေါက်ကြားမှုမရှိစေရေးအတွက် မည်သို့ကိုင်တွယ်သွားရမည်နှင့် ပတ်သက်၍လည်း ဥပဒေများကိုချမှတ်ပေးခဲ့ခြင်းနဲ့အတူ အခြားသောဥပဒေများကို သတ်မှတ်ပေးခဲ့ပါတယ်။