Amazon မှ ၎င်းတို့ရဲ့ လက်လီအရောင်းဌာနရဲ့ CEO အလုပ်မှနှုတ်ထွက်ကြောင်း ကြေငြာမှုပြုလုပ်ခဲ့ပြီး ရက်သတ္တပတ်အနည်းငယ်အကြာတွင် CEO အသစ်ရဲ့ အမည်ကို ထုတ်ဖော်၍ ကြေငြာမှုပြုလုပ်ခဲ့ပါတယ်။ 

ကုမ္ပဏီနဲ့ ၁၇ နှစ်ကြာ လက်တွဲလုပ်ကိုင်ခဲ့သော Doug Herrington ဟာ ယခုအခါ Amazon ရဲ့ ကမ္ဘာတစ်လွှားရှိ စတိုးဆိုင်လုပ်ငန်းများရဲ့အကြီးအကဲဖြစ်လာမှာဖြစ်ကြောင်းကို Amazon ရဲ့ အကြီးအကဲဖြစ်သူ Andy Jassy မှ e-mail တစ်စောင်တွင် ရေးသားခဲ့ပြီး ထိုအကြောင်းကို ကုမ္ပဏီရဲ့ website ပေါ်မှတဆင့် ကြေငြာပေးခဲ့ပါတယ်။ 

Jassy ရဲ့ e-mail အရ Herrington ဟာ Amazon ရဲ့ စားသုံးသူဝန်ဆောင်မှုပိုင်းဆိုင်ရာလုပ်ငန်းများတွင် အတွေ့အကြုံများစွာရှိပြီးသူတစ်ဦးဖြစ်ပြီး သူဟာ “၂၀၀၅ ခုနှစ်တွင် ကုမ္ပဏီသို့ စတင်ဝင်ရောက်ခဲ့ပြီးနောက် ၂၀၀၇ ခုနှစ်တွင် AmazonFresh ကို တည်ဆောက်ရာတွင်လည်း ပါဝင်ခဲ့သူတစ်ဦးဖြစ်ပြီး ၂၀၁၅ ခုနှစ်မှာတော့ Amazon မြောက်အမေရိကတိုက်ရဲ့ စားသုံးသူဝန်ဆောင်မှုပိုင်းဆိုင်ရာလုပ်ငန်းများကို ဦးဆောင်ခဲ့သူတစ်ဦး ဖြစ်ပါတယ်” ဟူ၍ ရေးသားထားခဲ့ပါတယ်။